Magapatuman ang Commission on Elections sang nationwide two-day money ban sa diin ginadumilian ang pagdala ukon pag-transport sang masobra P500,000 nga cash ukon sa foreign currency equivalent sini.
Ang money ban ang mangin epektibo sang Mayo 11 kag magapadayon tubtob sa adlaw sang eleksyon sa Mayo 12 sandig sa Section 28 sang Comelec Resolution No. 11104.
Sakop sini ang cash nga may upod nga campaign paraphernalia ukon materyales nga magaserbe bilang ebidensya sang electoral offenses.
Sa interview sang Bombo Radyo kay Atty. Reinier Layson, Provincial Election Supervisor sang Comelec-Iloilo, iya ginpahayag nga agud mapatuman ang pag-ban, tanan nga Comelec checkpoints nationwide ang maga-implementar sang round-the-clock inspections.
Suno kay Atty. Layson, ang money ban ang nagaserbe “tool” agud mabuligan ang Comelec nga ma-identify ang mga paghulag sang kwarta sa tion sang election period nga mahimo indicator sang vote-buying activities.
Makabulig man ini pahayag niya nga makahimo sang baseline sang impormasyon sa pag-imbestiga sang ginadudahan nga financial behavior.
May yara man sang exceptions sa money ban kaangay na lang sang mga cashiers ukon disbursing officers nga naga-transport sang cash bilang kabahin sang ila trabaho apang dapat may yara sila sang ipalita nga certificate of employment kag identification card nga nagapakita sang ila pangalan, laragway, designation kag pirma.
Nagpaandam man ang Comelec sa unusual nga mga financial transactions sa election period lakip na ang pag-withdraw sang dako nga balor sang cash, digital wallet transfers ukon pagpabaylo sang check nga nagalapaw sa P500,000 nga wala sang maathag nga economic justification ang makabig nga suspicious kag mahimo i-angot sa vote-buying ukon vote-selling.
Ang ini nga transaksyon ang sandig sa Section 29 sang nasambit nga resolution.
May yara man sang gahom ang Comelec nga imbestigaran ang mga financial record sang mga kandidato, organisasyon ukon grupo sa bulig sang mga government agencies kaangay sang Commission on Audit (COA), Bangko Sentral ng Pilipinas (BSP), Bureau of Internal Revenue (BIR), National Bureau of Investigation (NBI), Armed Forces of the Philippines (AFP), Philippine National Police (PNP), kag local barangay officials.
Samtang, tanan nga financial kag non-bank institutions ang kinahanglan nga mag-report sang ano man nga makaduluda nga transaksyon sa Bangko Sentral ng Pilipinas kag sa Anti-Money Laundering Council (AMLC).
Sa idalom sang Section 43 sang Comelec Resolution No. 11104, ang sin-o man nga kandidato nga mapamatbatan nga guilty sang vote-buying ukon pag-release ukon pag-disburse sang public funds kadungan sang prohibited period nga 45 days antes ang regular election ukon 30 days antes ang special election ang magapangatubang sang immediate disqualification.
