ILOILO CITY- Isa lang ang ideklarar sang Commission on Elections (COMELEC) agud mangin standard bearer sang ruling party nga Partido Demokratiko Pilipino- Lakas ng Bayan ukon PDP Laban para sa May 2022 elections.
Ini may kaangtanan sa pagbaton ni Senator Manny Pacquiao sang nomination sa pagka- presidente sa idalom sang Pacquiao- Koko Pimental faction apisar nga una na nagdeklarar ang faction ni Energy Secretary Alfonso Cusi nga si Sen. Bong Go ang ila presidential nominee kaupod si Pres. Rodrigo Duterte para sa pagka-bise presidente.
Sa interview sang Bombo Radyo kay COMELEC Commissioner Atty. Rowena Guanzon, iya ginpahayag nga desisyunan pa sang COMELEC en banc kon sin-o ang mangin opisyal nga kandidato sang PDP Laban.
Ginpasigurado man ni Guanzon nga mangin patas sila sa himuon nga desisyon.
Suno kay Guanzon, mahimo sa gihapon magpasa sang certificate of candidacy (COC) ang Pacquiao kag Cusi factions sa diin magaagi pa ini sa deliberasyon.
Apang sa ulihi, isa lang ang pilion nga mangin standard bearer sang ruling party kag ang isa ka faction ang mahimo nga mangin independent candidate na lamang.
