Magapatuman ang Commission on Election (COMELEC) sang hugot nga pagbantay sa campaign spending sa palaabuton nga May 12, 2025, elections.
Sa interview sang Bombo Radyo kay Mr. Jonathan Sayno, Election Assistant II sang COMELEC-Iloilo City, iya ginpahayag nga hugot nga bantayan sang poll body ang mga kontribusyon kag gasto sang mga kandidato sa piniliay.
Suno kay Sayno, mahimo man sila makapangayo sang bulig sa COMELEC sang mga election watchdog agud mabuligan sila sa pagbantay sang mga gasto sa kampanya kag i-verify ang mga dokumento nga ipasa sang mga nagdaog kag nalutos nga mga kandidato sa pagkatapos sang piniliay kaangot sa ila actual nga mga gasto.
Santo sa pagsulundan sang piniliay, kinahanglan sang tanan nga mga kandidato nga magpasa sang ila statement of contributions and expenses (SOCE) 30 ka adlaw pagkatapos sang eleksyon.
Ang indi pagsunod diri mahimo makapugong sa isa ka nagdaog nga kandidato nga magapungko sa pwesto kag magapangatubang sang kaso administribo kag multahan sang tubtub P30, 000.
Ang mga kandidato para sa senado, kongreso kag iban pa nga local nga kandidato nga nakarehistro sa idalom sang isa ka Partido pampulitika ginapasugtan nga mag-gasto lamang sang P3 sa kada bontante.
Samtang, ang mga independent nga kandidato nga wala sang suporta halin sa ano man nga partido ginapasugtan nga mag-gasto sang P5 para sa kada rehistrado nga botante.
