Ginhingyo sang Commission on Elections (Comelec) sa Department of Agriculture (DA) nga ipaiway anay subong kag padayunon lang kun matapos na ang eleksyon ang implementasyon sang P20 per kilo rice program.
Suno kay Comelec Chairperson George Garcia, paagi ini agud nga malikawan ang mga akusasyon nga ginagamit sang gobyerno ang bugas para sa pulitika ilabi na bangud sa Mayo 12 na ang national and local elections.
Matandaan nga nahatag na sang Comelec ang exemption sa DA sa spending ban sa idalom sang Section 261 (V) sang Omnibus Election Code base sa Comelec Resolution 11060.
Apang suno sa poll body chief, ang local government units (LGUs) nga magapatuman sang sini nga rice program ang sakop pa sa gihapon sang 10 ka adlaw nga ban sa distribusyon sang tanan nga porma sang welfare and social assistance. Ang lamang nga exempted sa sini nga ban amo ang burial kag medical assistance programs.
Pahayag ni Garcia, ang P20/kilo rice project nga iimplementar sang LGUs ang makabig nga porma sang ayuda gani nga covered pa ini sang ban.
Apang dugang niya, wala sila sang nabaton nga request for exemption halin sa local government sang Cebu kun sa diin iga-launch sang DA ang programa subong nga adlaw.
Sa bahin sang Palasyo, nagpahayag si Presidential Communications Undersecretary Claire Castro nga bukas ang Malaca ang sa gin-proponer sang poll body agud masiguro ang pagsunod sa 10-day spending ban.
