ILOILO CITY- Nagpaandam ang Commission on Elections (COMELEC) sa tanan nga mga kandidato nga magahingalit sa pagpanagtag sang relief goods para sa mga biktima sang kalamidad agud magpangampanya.
Sa interview sang Bombo Radyo kay Atty. Ian Lee Ananoria, Iloilo Provincial COMELEC Supervisor, iya ginpahayag nga makabig nga vote-buying ang pagpanagtag sang sin-o man nga kandidato sang ano man nga sahi sang donasyon.
Suno kay Ananoria, kun may yara man sang idonar, kinahanglan nga ipaagi gid ini sa Department of Social Welfare and Development (DSWD) upod sa Philippine Red Cross.
Pahayag niya, kun may yara gid man sang luyag maghingyo sang exemption agud mapahanugutan nga manghatag sang bulig, ini nga request ang ginadiretso gid sa Campaign Finance Office sa COMELEC Central Office.
