ILOILO CITY – Bukas na liwat ang opisina sang Commission on Elections (COMELEC) sa Syudad sang Iloilo agud magbaton sang mga luyag magpa rehistro para sa 2022 Presidential and Local elections.
Sa exclusive interview sang Bombo Radyo kay Mr. Jonathan Sayno, City Comelec election assistant 2, iya ginpahayag nga sang Enero, nagbaton sila sang mga luyag magpa register apang gin-untat sang Pebrero bangud sa Coronavirus disease 2019 (COVID-19) pandemic.
Suno kay Sayno, liwat naman nga ginbalik ang registration sang Setyembre 1 sa diin mas ginhugtan nila ang protocol sa mga mapa rehistro.
Bukas ang opisina sang COMELEC kada Martes tubtub Sabado, umpisa las 8:00 sang aga tutub las 3:00 sang hapon.
Ginpahayag sang natungdan nga ginapatuman nila ang No Face Mask, No Face Shield, No Registration Policy.
Lakip sa mga dapat himuon sa pagpa rehistro amo ang mga masunod:
- I-download ang application form sa www.comelec.gov.ph kag sulatan ang impormasyon nga kinahanglan. Indi na ini pagpirmahan.
- Suksukon ang face mask kag face shield antes magsulod sa opisina sang COMELEC.
- Mag-sanitize sang mga kamot kag magtapak sa foot bath.
- Sulatan ang Health Declaration Form kag pirmahan ang application form gamit ang kaugalingon nga ballpen.
- Sundon ang mga pagsulundan nga gintalana para sa physical distancing.
- Mag-sanitize sang mga kamot antes kag pagkatapos gamiton ang signature pass kag fingerprint scanner.
- Kakason lang ang face shield kag face mask kun kuhaan sang picture para sa biometrics capturing.
- Pagkatapos magpa rehistro, gilayon na nga maghalin sa opisina sang COMELEC.
Lakip naman sa mga kinahanglan nga dokumento para sa voter registration kag transfer of registration, magdala lang sang:
- Postal ID
- PWD Discount ID
- Student’s ID ukon library card
- Senior Citizen ID
- Driver’s license
- NBI clearance
- Passport
- SSS/GSIS ID
- IBP ID
- PRC License
- NCIP Certificate of Confirmation ukon
- Anuman nga mga valid ID
Kun wala nabutang sa ID nga imo dala ang current address, mahimo magpangayo sang dugang nga dokumento ang election officer.
Para naman sa change ukon correction of entry, ukun mag-ilis sang pangalan bangud sa kasal, court order ukon order sang Civil registrar ukon Consul General, magdala sang orihinal nga certified true copy ukon anuman sa mga masunod:
- Certification by the solemnizing officer
- Marriage contract ukon court order with certificate of finality kag
- Order by the Civil Registrar ukon Consul General.
Sa mga may dugang pa nga pamangkot sa City COMELEC office, mahimo magtawag sa 337-5901.
