ILOILO CITY – Nagpahanumdom ang Commission on Elections sa publiko nga indi magtinir sa mga voting centers kadungan sang pamahog sang COVID-19.
Sa interview sang Bombo Radyo kay Atty. Wilfred Jay Balisado, director sang COMELEC-Region VI, iya ginpahayag nga antes magpadulong sa mga voting centers, dapat nahibaluan na kung sin-o ang botohon.
Mas maayo suno kay Balisado nga may yara sang listahan sang mga kandidato kag may kalakip nga numero.
Pagkatapos nga magboto, magpauli sa gilayon.
Samtang, nagpahumdom naman si Balisado nga indi mag over vote bangud indi maisip sang voting-counting machine (VCM) kung sobra ang i-shade.
Yari ang numero sang dapat nga botohon sa tagsa ka posisyon.
Tag-isa sa president, vice president kag party-list samtang, indi dapat nga magsobra sa 12 ang botohon sa pagka-senador.
Sa lokal, tag-isa sa gobernador, bise-gobernador, congressman, alkalde kag bise aldake.
Sa syudad, indi magsobra sa 12 ang konsehal samtang indi man magsobra sa walo sa mga kabanwahan.
Duha naman ang mga board members sa tagsa ka distrito sa mga probinsya.
