Preparado na ang Cabatuan, Iloilo Commission on Elections (COMELEC) Officers and volunteer’s para sa eleksyon buwas nga adlaw Mayo 12, 2025.
Sa interview sang Bombo Radyo kay Cabatuan COMELEC officer III Cecile Ann Fortunado, iya ginpahayag nga 100% na nga ‘ready’ ang ila mga election supplies nga paga-distribute sa tagsa ka mga kabaranggayan buwas nga adlaw.
Suno kay Fortunado, pagadul-ong ini alas-12:00 tubtub alas-3:00 sang kaagahon sa mga polling precincts. Alas-4:00 magabukas na ini kag alas-5:00 naman magasugod tubtub alas-7:00 ang pagboto sang mga senior citizens, PWD’s.
Hatagan man sila sang nagakaigo nga assistance para sa ila kahigayunan nga makaboto sa gilayon.
Nagpaandam man ini sa mga botante nga kun magpadulong sa tagsa ka mga presinto, likawan ang magkuha sang mga litrato sang ila nga mga resibo sang balota bangud ginakonsiderar ini nga paglapas sa COMELEC regulations.
Dugang pa ni Fortunado nga kun may mga iregularidad nga nagakatabo ukon mga krimen nga ginahimo, mahimo ini nga madokumento agud may mapakita nga ebidensya kun may magreklamo.
Text by: Bombo Volunteer Cherie Mae Marcon
