Nagapadayon gihapon ang Commission on Elections (Comelec) Region VI sa pag-monitor sa mga lokalidad agud matumod kun may mga lugar pa sa rehiyon nga idugang sa areas of concern samtang nagahilapit ang Mayo 12 nga national and local elections.
Sa interview sang Bombo Radyo kay Atty. Dennis Ausan, regional director sang Comelec Western Visayas, iya ginpahayag nga maid-id ang monitoring amo man ang evaluation kag assessment bangud may yara sang Joint Security Control Center sa kada locality.
May yara naman sang resolusyon sa Regional Joint Security Control Center kaangot sa election areas of concern apang suno kay Ausan, indi pa sa subong mabuyagyag ang kaundan sini bangud sandig sa pagsulundan sang en banc, ang Comelec chairman lamang ang makasapubliko sang lista para masiguro nga nagasalanto ang data sa central office sang poll body.
Matandaan nga sa nagligad nga press conference, ginpahayag nga may walo ka mga banwa sa probinsya ang ginrekomendar nga ilakip sa areas of concern kasunod sang serye sang mga pagsinapol nga ginpatigayon sang Provincial Joint Security Control Center kag security agencies.
Sa latest data naman sang poll body nga gin-release sang Marso 2025, 11 ka local government units sa Region VI ang napaidalom sa yellow category ukon may history sang election-related incidents kun sa diin nalakip ang Ajuy, Lemery, kag San Dionisio sa Iloilo.
Anum naman ang nagtupa sa orange category ukon areas nga may serious armed threats kun sa diin nalakip ang Janiuay, Alimodian, Maasin, Badiangan, kag San Joaquin sa Iloilo.
Ang 90 ka iban pa ng LGUs sa Western Visayas ang na-classify nga sa idalom sang green category nga nagakahulugan nga wala sang pamahog sang election-related violence apang ginabantayan sa gihapon sang awtoridad.#
