Wala ginapahanugutan ang pag-gamit sang salakyan sang gobyerno para sa anuman nga election campaign purposes. Gin-athag ini sang Commission on Elections (Comelec) kasunod sang pag-umpisa na sang campaign period para sa national candidates nga amo naman ang posible maggamit man sang ila nga local counterparts para sa pagpangampanya.
Sa idalom sang Section 261(O) sang Omnibus Election Code, ginadumilian nga gamiton ang ano man nga sahi sang equipment ukon salakyan nga ginapanag-iyahan sang gobyerno, government-owned ukon controlled corporations, ukon Armed Forces of the Philippines para sa election campaign ukon anuman nga sahi sang partisan political activity.
Sa interview sang Bombo Radyo kay Atty. Wil Arceño, provincial election supervisor sa probinsya sang Antique, ginpaathag sini nga ang indi pwede nga makapartisipar sa partisan political activities amo ang mga mga empleyado sang tanan nga ahensya sang gobyerno, career officers, kag uniformed personnel.
Wala nalakip diri ang presidente kag bise presidente, myembro sang Gabinete, kag iban pa nga elected officials magluwas sa barangay officials.
Apang apisar elected ang opisyal, indi pwede nga magamit ang salakyan kun para sa purpose nga indi sakop sang opisina ukon wala sang labot sa official function sang elected official.
Aminado ang poll body nga may mga grey areas pa nga kinahanglan nga athagon ilabi na sa limitations para sa political officers ukon mga persona nga yara sa elective office.
Mangin ang national office sang Comelec ang nagpahayag nga may dapat pa i-clarify sa Department of the Interior and Local Government (DILG) kag sa Civil Service Commission (CSC) may kaangtanan sa sini nga pagsulundan.
Na-ungkat ang isyu sa paggamit sang red-plated government vehicles sang damlag lang matapos nag-viral ang motorcade ni presidential candidate Bongbong Marcos kaupod ang local officials sang San Jose del Monte, Bulacan sang Lunes.
Sakay si Marcos sa puti nga salakyan nga may nakatatak nga government logos apang sang amo nga tion, wala pa nagaumpisa ang election campaign period gani nga nagpahayag ang iya kampo nga wala sang may nakomiter nga violation. ##
