Ginaproblema subong sang Commission on Elections sa banwa sang Zarraga, Iloilo nga wala sila sang budget subong nga tuig.
Sa interview sang Bombo Radyo kay Mr. Henry Masna, Election Officer III sang Zarraga, Iloilo, iya ginpahayag nga sang 2024 pa nila naplastar ang kinahanglanon nga budget nga P383,000 para sa mga aktibidad may kaangtanan sa eleksyon subong nga tuig.
Apang suno kay Masna, nakibot na lamang sila nga sa session sang Municipal Council sang nagligad nga semana, ginpahibalo lang sila nga wala naaprubahan ang ila budget.
Pahayag niya, tuman gid nila nga ginkadismaya ini nga development.
Sa subong, wala pa nila maistorya ang council kun ano ang rason nga wala ini maaprubahan.
Sa pihak sini, sa iya nga bahin, tinguhaan niya nga mangita sang paagi agud nga matatapan ang ila kinahanglanon nga gasto para sa eleksyon.
