Ginkumpirma sang Commission on Elections sa Iloilo City nga pending gihapon ang appeal ni former Iloilo City Mayor Jed Patrick Mabilog nga i- reactivate ang iya voting rights.
Sa interview sang Bombo Radyo kay Mr. Jonathan Sayno, Election Assistant II sang City COMELEC, iya ginpahayag nga ini bangud nga nagaprepar pa ang Election Registration Board (ERB) para sa deliberasyon sa amo nga butang nga ang hearing ang natalana sa Oktubre 12.
Suno kay Sayno, wala pa kasiguruhan ang appeal ni Mabilog nga mag- reactivate bangud posible nga may magtuhaw nga objections.
Ang board nga maga-review sang application ni Mabilog ang ginabug-usan sang city election officer, local civil registrar, kag city schools superintendent.
Ginpaathag ni Sayno nga sa tion nga indi pag-aprubahan ang reactivation ni Mabilog, mahimo siya mag-file sa korte sang petition for inclusion agud mabalik siya sa voter’s list kag ini ang wala na malakip sa hurisdiksyon sang COMELEC.
Apang suno kay Sayno nga sa pihak sang pending appeal, sarang gihapon sang anay alkalde nga mag-file sang certificate of candidacy (COC) sa Oktubre 1 tubtob 8.
Matandaan nga ginpaaagi ni Mabilog sa e-mail ang iya application for reactivation sang Agusto 22 sa COMELEC kag ginsundan sang video conference oath-taking pagkasunod nga adlaw base man sa kumpirmasyon ni Sayno.
