ILOILO CITY- Nagpahanumdom ang Commission on Elections (COMELEC) sa ginapatuman nga priority lane sa pagparehistro agud makaboto sa 2022 elections.
Sa exclusive interview sang Bombo Radyo kay COMELEC Commissioner Atty. Rowena Guanzon, iya ginpahayag nga lakip sa mga ginahatagan sang prayoridad nga makaparehistro amo ang Persons with Disabilities (PWD), senior citizens, nagabusong, frontliners, medical interns kag residents, kag mangin ang mga driver sang ambulansya.
Suno kay Guanzon, nagakadapat nga magdala sang Identification card (ID) agud makapamatuod sang identity sang isa ka persona.
Pahayag niya, kun ang tigulang wala sang seniors ID, mahimo magdala sang ano man nga ID nga may petsa sang birthday.
Kun wala naman sang PWD ID, mahimo magpakita sang maskin ano nga government ID; kun psychosocial PWD, dapat magdala sang medical certificate kun wala man sang PWD ID.
