ILOILO – Nagsapol sanday Iloilo Governor Arthur ‘Toto’ Defensor Jr. , Iloilo 4th district Board Member Rolando Distura kag Engr. Ronaldo Naragdao, pinuno sang Philippine Atmospheric, Geophysical and Astronomical Services Administration Iloilo station.
Ini agud istoryahan ang mga lihok nga pagahimuon may kaangatanan sa Disaster Risk Reduction and Management nga patigayunon sa probinsya sang Iloilo.
Sa interview sang Bombo Radyo kay Gov. Defensor, iya ginpahayag nga naistoryahan sa nasambit nga pagsinapol ang mga Disaster Risk Reduction and Management projects nga patigayunon sang PAG-ASA, provincial government kag iban pa nga mga ahensya sang gobyerno.
Suno sa gobernador, isa sa posible ipatuman amo ang pagpahamtang sang command centers sa mga banwa sa probinsya kun sa diin ang provincial government ang magapatukod sang pasilidad samtang PAG-ASA naman ang magahalin sang mga equipment nga pagagamiton.
Dugang sang natungdan, naistoryahan man ang pagpatukod sang weather centers para sa mga mangunguma bangud dako ang kahilabtanan sang lakat sang panahon sa agrikultura sa probinsya.
