ILOILO CITY — Nagapati si Commission on Elections Chairman Atty. George Erwin Garcia nga mangin matalunsay ang internet voting para sa mga overseas Filipino workers para sa 2025 elections.
Sa interview sang Bombo Radyo kay Garcia, iya ginpahayag nga eksklusibo nga gamiton ang internet voting system para sa mga Filipino nga botante nga yara sa luwas sang pungsod.
Suno kay Garcia, nagpatuman sang post-qualification evaluation ang joint venture (JV) sang SMS Global Technologies, Inc. kag Sequent Tech Inc., ang bidder nga may lowest calculated bid (LCB) para sa kontrata sang Oline Voting and Counting System (OVCS).
Ginpahayag man ni Garcia nga ginpakita kag gin-athag sang joint venture ang mga ikasarang sang teknolohiya kaangay sa pagkuha sang live nga selfie agud ma-enroll sa system kag matapna ang mga nagatuyo nga mag-gamit sang AI para gub-on ang dalagan sang eleksyon.
Nagpasalig man ini nga busision sang ahensya ang mga impormasyon sang isa ka botante paagi sa database sang rehistrado nga pangalan nga may laragway kag biometrics sini antes makaboto.
Matandaan nga sang tinalikdan nga tuig, gin-aprobahan sang Commission on Elections (COMELEC) ang internet voting para sa overseas Filipino voters para sa 2025 midterm elections.
Ginalauman naman nga hiwaton ang voter enrollment sa Disyembre ukon Enero sa masunog nga tuig.
