ILOILO CITY – Gin-ako sang Commission on Elections (COMELEC) nga mabudlay tumuron nga may nagakatabo nga pagbaklanay sang boto sa tion sang eleksyon.
Sa interview sang Bombo Radyo kay Atty. Wilfred Jay Balisado, director sang Commission on Elections (COMELEC)- Region VI, iya ginpahayag nga mabudlay nga pamatud-an nga vote buying ang paghatag sang kwarta bangud mahimo nga i-rason nga bayad sa utang ang kwarta apisar nga sa pagkamatuod, may vote buying gid man nga natabo.
Suno kay Balisado, dako ang posibilidad nga ma-dismiss lang ang kaso nga ipasaka sang ahensya.
Pahayag dugang ni Balisado nga ang konsensya nalang sang tawo ang bahala kun bala botohon ang naghatag sang kwarta ukon mangin rason ini nga indi niya pagbotohan ang kandidato.
Dugang pa ni Balisado, mauntat gid lamang ang vote buying kung wala na sang may mapabakal sang boto.
Nagakadapat suno kay Balisado nga ma-insulto ang botante kun hatagan sang kwarta kabaylo sang iya boto.
