ILOILO CITY – Magapatigayon sang imbestigasyon ang Committee on Moral and Recovery tuhoy sa ginapahayag sex den sa sulod sang Iloilo Terminal Market.
Sa interview sang Bombo Radyo kay Iloilo City Councilor Jojo Javellana, chairman sang Committee on Moral and Recovery sa konseho, iya ginpahayag nga iya padulungan subong nga adlaw ang Iloilo Terminal market agud nga istoryahon ang market-in-charge nga si Mr. Eric San Gaustin agud mahibalu-an kun bala matuod gid man nga may yara sang sex den sa sulod sang merkado.
Suno kay Javellana, kinahanglan nga makapangita sang ebidensya agud nga indi makabig nga hearsay ukon huring-huring ang nasambit nga isyu.
Ang makuha naman nga mga ebidensya suno sa natungdan ang pagatipunon agud nga iplastar sa committee hearing.
Samtang, suno naman kay Iloilo City Councilor Ely Estante, chairman sang Committee on Market and Slaughterhouse sa konseho, iya ginpahayag nga luyag niya nga magpakigsapol kay Local Economic Chief Ariel Castañeda, ang market-in-charge nga si Mr. Eric San Agustin kaupod ang mga manugbaligya sa nasambit nga merkado.
Suno kay Estante, indi an madali-dali ang pagpatigayon sang committee hearing bangud nga wala pa man sang written complaint nga ginpalab-ot sa Iloilo City Government.
Luyag man ni Estante nga magpakig-angot kay Javellana ilabi pa nga ang mga menor de edad ang kalabanan nga biktima sang human trafficking.
