Nagapati ang chairman sang Committee on Energy and Public Utilities sang Iloilo City Council nga dapat mangin epektibo ang komunikasyon sang Metro Pacific Iloilo Water (MPIW) sa ila mga konsumidor.
Sa interview sang Bombo Radyo kay Iloilo City Councilor Romel Duron, chairman sang Committee on Energy and Public Utilities, iya ginpahayag nga dapat pasangkaron sang water distributor utility ang ila information dissemination agud malab-ot ang madamo nga mga residente.
Suno kay Duron, ang tikang ang isa man ka palaagyan agud nga mangin justifiable ang ila increase sa bill sang tubig.
Ginpaangid man sini ang Metro Pacific Iloilo Water sa social media sang MORE Electric and Power Corporation, kon sa diin, aktibo nga naga-update ang power distributor sa ila mga tikang.
Ginduso man sini nga sundon sang Metro Pacific Iloilo Water ang mga tikang sang power distributor agud mas makapamaayo sa mga konsumidor kag mapahibalo sang ila mga masunod nga plano.
Gintumod man sang natungdan nga nag-ako man ang Metro Pacific Iloilo Water nga mahina ang ila serbisyo bangud man sa madamo nga problema lakip na ang mga leakages sang ila tubo.
