Committee on Engineering, Construction, and Public Works sang Iloilo City Council, gin-athag nga naka-contibute ang DPWH sa pagpa-untat sang pito ka mga proyekto sang Iloilo City

𝗜𝗟𝗢𝗜𝗟𝗢 𝗖𝗜𝗧𝗬 —Gin-athag sang Committee on Engineering, Construction, and Public Works sang Iloilo City Council nga naka-contibute ang Department of Public Works and Highways (DPWH) kun ngaa ginpa-untat ang pito ka mga proyekto nga yara sa idalum nila.

Sa interview sang Bombo Radyo kay Iloilo City Councilor Johnny Young, chairman sang nasambit nga komitiba, iya ginpahayag nga gin-sumite niya sa konseho ang amo nga resolusyon kag wala sang may nag-object, sa diin, isa lamang ang nag-abstain nga amo si Iloilo City Councilor Uriminico “Nick” Baronda.

Suno kay Young, ang kaso sa DPWH amo ang ginahingyo sa ila nga magpasa sang requirements sang mga proyekto nga nagsugod human sang 2022, apang tubtob subong, wala sa gihapon na-comply ang ahensya.

Ginpahayag man ni Young nga isa man ini ka rason kun ngaa ginkansela ang ila nga kontrata apisar nga makapila na ka beses ang ahensya nga naga-remind sa kada committee hearing.

Gin-athag man sang natungdan nga ginhatagan sila sang kahigayunan nga magpasa, apang wala sila sang may gin-akto agud nga maka-comply sang ginapangayo nga requirements.

Ginpakamalaut naman ni Young ang pasayapan nga ginahimo sang DPWH, bangud naanad na ang ahensya nga wala gakuha sang permit antes paman magpatukod sang isa ka proyekto.