𝗜𝗟𝗢𝗜𝗟𝗢 𝗖𝗜𝗧𝗬 — Nagapati ang Committee on Engineering, Construction, and Public Works sang Iloilo City Council nga natun-an ni Iloilo City Mayor Jerry Treñas ang pagpauntat sang pito ka mga proyekto nga yara sa idalum sang Department of Public Works and Highways (DPWH).
Sa interview sang Bombo Radyo kay Iloilo City Councilor Johnny Young, chairman sang nasambit nga kooperatiba, iya ginpahayag nga indi man magdesisyon ang alkalde kun wala niya ini natun-an sang mayo antes magpasar sang resolusyon.
Suno kay Young, mismo si Treñas ang nakabaton sang mga reklamo sang mga pumuluyo tuhoy sa delay nga konstruksyon, sa diin, nagdesisyon ini nga pauntaton bangud makasarang ang syudad nga pondohan ang pito ka mga proyekto.
Ginatugyan naman ni Young ang mangin desisyon sa alkalde bangud nagapati ini sa kapasidad ni Treñas.
Ginpahayag man sini nga indi na kinahanglan liwat nga magpatuman sang committee hearing bangud madugay na ini nga problema sang mga pumuluyo antes paman nga ginpauntat sang city government.
Nahibaluan nga base sa ila nga pagkonsulta, wala gintandog ang mga proyekto bangud wala pa sang budget, sa diin, ginapangitaan pa sang city government.
Gin-athag man sang natungdan nga ang isyu sa problema, indi ang permit sang mga proyekto, bangud kulang lang ini sa funding.
