Ginaduso sang Committee on Engineering, Construction and Public Works sang Iloilo City Council nga imbestigaran ang Mandurriao Public Market bangud sa kakulangan sang City Engineers Office.
Sa interview sang Bombo Radyo Iloilo City Councilor Johnny Young, chairman sang Committee on Engineering, Construction and Public Works, iya ginpahayag nga ginpatawag na ang nasambit nga opisina bangud sa tuman ka delay na gid ang proyekto.
Nagsugod ang pagtukod sang merkado sang Nobyembre 2021 kag nag-resume sang Agosto 2022 kag nagpasalig nga matapos Nobyembre 2023 apang wala natigayon matapos.
Suno kay Young, suno sa City Engineers Office, na-delay bangud sa pag-untat trabaho sang 2021.
Ginpahayag man sini nga sa subong natapos na ang kabilogan sang merkado.
Magapatuman naman sang ocular inspection ang talatapan kaupod ang Office of the Building Official (OBO) agud ma-check ang Mandurriao Public Market.
Una na nga nagpahayag ang City Engineers Office nga nakulangan sang budget ang proyekto rason nga na-delay kag wala gilayon napadayon.
