Ginpahayag sang Committee on Infrastructure sang Sangguniang Panlalawigan nga handa sila mag-akto kun itugyan sa ila ang imbestigasyon may kaangtanan sa mga flood control projects sa bilog nga probinsya sang Iloilo.
Sa interview sang Bombo Radyo kay 4th District Board Member Rolando Distura, Chairperson sang Committee on Infrastructure, iya ginpahayag nga ginapaabot niya ang posibilidad sang isa ka province-wide nga imbestigasyon matapos ang ginpatigayon nga initial nga pag-usisa sa 5th District sa pagpanguna ni Board Member Rolex Suplico.
Suno kay Distura, ginadayaw niya ang ini nga hilikuton, ilabi na nga ginbuligan sang media ang pag-imbestigar sang mga proyekto nga nagalakip sang mga flood control measures nga ginpatuman sa pila ka lugar sa probinsya.
Gindugang pa ni Distura nga posible may iban pa nga mga Board Members nga magpadayon sang inisyatibo base sa ila tagsa-tagsa nga disposisyon.
Ginpunto man sini nga may posibilidad nga may mga “missing projects” nga kinahanglan i-lakip sa listahan kun ini masumiter na sang Department of Public Works and Highways (DPWH).
Samtang ginahulat pa ang pinal nga desisyon sang konseho, nagapadayon ang panawagan nga pasangkaron ang imbestigasyon agud masiguro nga ang pondo para sa flood control projects, ginagamit sang husto.
