ILOILO CITY – Ginakabig sang Committee on Police Matters sang Iloilo City Council nga makaalarma ang mga foreign nationals nga naga-negosyo sa syudad sang smuggled goods.
Sa interview sang Bombo Radyo kay Iloilo City Councilor Sedfrey Cabaluna, head sang Committee on Police Matters, iya ginpahayag nga nagalaum ang syudad nga mas madamo pa sang magkaladakpan nga foreign nationals nga nagabaligya sang smuggled goods sa Iloilo City.
Suno kay Cabaluna, mas makapamaayo kon mas temprano nga matumod ang mga iligal nga aktibidad sang pila ka mga foreign nationals agud nga gilayon ma-intensify ang mga tikang batok sa amo nga buluhaton.
Ginpahayag man sini nga kinahanglan nga doblehon ang koordinasyon sang Bureau of Immigration kag Philippine National Police (PNP) sa pag-atubang sang amo nga mga kaso ilabi na nga may nagakalatabo na nga smuggling sang produkto sa syudad.
Ginhatagan man sini sang empasiya, ang rolyo sang Bureau of Immigration sa pag-monitor sa mga kaangay sini nga kaso agud nga gilayon mapahibalo sa publiko, local authorities kag law enforcement agencies.
Gintumod man sini nga indi lamang ang pagbaligya sang smuggle nga goods ang tutokan bangud may yara man sang mga kaso sang overstaying sang mga foreign nationals nga naga-negosyo sa syudad.
Nahibaluan nga naaresto ang isa ka Chinese National sang nagligad nga mga adlaw sang 4th Special Operation Unit Maritime Group bangud sa pagpanag-iya sang bodega nga may P4.8-million nga balor sang smuggled cigarettes.
