ILOILO CITY – Nagpanugyan ang chairman sang Committee on Public Utilities sa Iloilo City Council nga gamiton sang insakto ang tubig kag kuryente.
Sa interview sang Bombo Radyo kay Councilor Romel Duron, chairman sang amo nga komitiba, iya ginpahayag nga dapat nga magtipig sa paggamit sang tubig kag kuryente ang mga pumuluyo sang syudad bilang kabahin sa preparasyon sang El Niño.
Suno kay Councilor Duron, apisar wala pa sang El Nino, ginakulang na ang supply gani, dako ang posibilidad nga magdako pa ang demand sa tion nga magdeklarar na sang Philippine Atmospheric, Geophysical and Astronomical Services Administration ang pagsugod sang El Niño phenomenon.
Nagpahanumdom man ang konsehal sa mga pumuluyo nga ang pagtipig sang utiliies ang nagasugod sa tagsa ka panimalay.
Dugang pa sang natungdan, indi lang magsalig sa gobyerno nga maghatag sang solusyon kag responsibilidad sang kada isa nga magbinuligay agud matapna ang mga daku nga problema kaangay sang kakulang sang tubig.
