Nag-ako ang chairman sang Committee on Rules, Ordinances, Resolutions, Style, Justice and Legal Affairs nga gin-deny sang komitiba ang proposal sa bulk water supply sang Aboitiz Group.
Sa interview sang Bombo Radyo kay Iloilo City Councilor Grace Parcon, iya ginpahayag nga ginpadala sa ila ang letter via email kon sa diin, nakasaad diri nga ang provincial and city government ang may intension nga magpangayo para sa water rights sa National Water Resources Board.
Suno kay Parcon, kon pahanugutan sang syudad ang letter of intent sang Aboitiz Group, kinahanglan anay nga magpangayo sang authority halin sa National Water Resources Board para sa water rights.
Ginpahayag man sini nga kon maaprubahan, iga-assign ini sa National Irrigation Authority (NIA) bangud ang water rights ang para sa irrigation purposes.
Agud naman nga magamit ini sang mga konsumidor, maubra sang Memorandum of Agreement (MOA).
Nahibaluan nga sa subong, wala sang kapasidad ang Iloilo City nga mag-produce sang water bulk supply rason man nga kinahanglan sang pribado nga third party agud nga maghatag sang supply.
Indi paman masabat sang Aboitiz Group ang pinal nga presyo nga ila igahatag sa syudad, rason man nga gin-reject ini sang konseho agud nga malikawan ang mataas nga billing sa tubig.
Gina-abi-abi naman sang Metro Pacific Iloilo Water (MPIW) ang proposal sang Aboitiz Group sa Iloilo City Government.
Suno Angelo Berba, Chief Operating Officer sang Metro Pacific Iloilo Water, iya ginpahayag nga tanan naman ang welcome agud nga magserbe nga water distributor sang syudad.
Ginpahayag man sini nga kon makabulig lang man sa pagpauswag sang supply sang tubig ang amo nga distributor, wala man sang rason agud nga punggan ini.
