𝗜𝗟𝗢𝗜𝗟𝗢 𝗖𝗜𝗧𝗬 —Nagpahanumdom ang Committee on Transportation sang Iloilo City Council sa mga operators sang terminal sa syudad nga indi mandatory ang pagbayad sang serbisyo sang mga comfort room ukon CR.
Sa interview sang Bombo Radyo kay Iloilo City Councilor Sedfrey Cabaluna, head sang Committee on Transportation, iya ginpahayag nga kabahin sang franchise sang isa ka terminal ang malimpyo nga CR rason indi ini mandatory nga baydan.
Suno kay Cabaluna, kun may yara sang legal nga complaint kag mapamatud-an nga nagbayolar paagi sa pagpabayad, magapangatubang sa mga penalties ang terminal operators kaangay na lamang sang suspension kag revocation sang franchise.
Gin-athag man sang natungdan nga okay lang ang donation apang indi ini compulsory bangud kabahin sang prangkisa sang isa ka terminal ang ipabilin nga malimpyo kag matawhay ang mga rest room.
Nahibaluan nga sa idalum sang ordinansa sang syudad, kinahanglan nga kompleto sa tubig, habon, tissue, kag pila ka mga necessities ang tagsa ka CR sang mga terminal.
