ILOILO CITY – Natalana nga magpasar sang resolution ang Committee on Transportation ang Sangguniang Bayan sang Pavia sa senado agud magpatigayon sang legislative inquiry in aid of legislation sa depektibo nga P680-Million Ungka Flyover sa masunod nga semana.
Ini matapos nga napaslawan ang komitiba nga makuha ang nagakaigo nga igtalupangod nagikan sa Kamara sang Disyembre 12 sang tinalikdan nga tuig.
Sa interview sang Bombo Radyo kay Pavia Sangguniang Bayan Member Jose Maria “Pyt” Trimañez, chairman sang nasambit nga komitiba, iya ginpahayag nga kinahanglan nga mahatagan sang madasig nga paghulag kag hustisya ang depektibo nga konstruksyon sang Ungka Flyover kun sa diin ang tanan nga piers ang nakitaan sang vertical displacement kag pagkulod-kulod.
Nahibaluan nga nakasaad sa imbestigasyon sang third-party consultant nga sa sulod sa 11 ka bulan, 16 tanan nga mga piers sang flyover ang may yara sang vertical displacement kun sa diin ang Pier 5 ang may pinakamadalom nga pag-usmod nga 583 millimeters ukon 22.9 inches; ginsundan sang Pier 6 nga may kadalumon nga 488 mm ukon 19.21 inches; kag Pier 4 nga may pag-usmod nga 431 mm ukon 16 inches.
Kabahin man diri ang assessment sang third-party consultant sa diin nagakinahanglan sang dugang nga P250-million nga pondo para sa rehabilitasyon sa nagpalpak nga proyekto.
Suno kay Trimañez, sa tion nga maaprubahan sang senado ang resolution, may ipahamtang nga fact finding committee agud pasabton ang mga kinahanglan manabat.
Sa subong, maga-upod sa condemnation rally ang Local Government Unit sang Pavia, mga progresibo nga grupo, university presidents, negosyante, kag mga pumuluyo sa Ungka Flyover agud ipakita nga indi ini kumporme sa pagpatukod sang flyover.
