Ginpunto sang Committee on Transportation sang Sangguniang Panlalawigan sang Iloilo nga mas maayo kon ipabilin sa Dumangas ang Roll-on, Roll-off (RoRo) operations.
Ini kasunod man sang plano nga sayluhon ang RoRo operations sang Dumangas Port sa Fort San Pedro, Iloilo City.
Sa interview sang Bombo Radyo kay Ex-Officio Board Member Ramon Sullano, chairman sang Committee on Public Utilities, iya ginpahayag nga ang tikang ang mahimo makatuga sang masakit nga epekto sa palangabuhian sang mga taga-Dumangas.
Suno kay Sullano, lantawon kag i-examine sang Sangguniang Panlalawigan kon mapasa gidman ang proposal antes maghimo sang desisyon ilabi na nga ginalantaw man nga mangin centralized ang transport facilities kon yara na ini sa syudad.
Indi man manegar nga may mga disbentaha man ini nga matuga, lakip na ang pagpugok sang trapiko kadungan sang pag-transfer sang operasyon sang Roll-on, Roll-off (RoRo) operations.
Nagapati man si Sullano nga antes ang pinal nga desisyon, ibutang gid ang general welfare ukon ang ikamaayo sang publiko ilabi na sang mga pasahero.
Nahibaluan nga ginahingyo na sang Philippine Ports Authority (PPA) ang endorsement kag Resolution of No Objection (RONO) sang Iloilo City Council agud mapatuman ang Port Zone Delineation Plan sang Port of Iloilo.
