Nangin mabinungahon ang ginpatigayon nga community forum kaangot sa pagatukuron nga Waste to Energy project sa bag-o nga Sanitary Landfill sa Brgy. Ingore, La Paz, Iloilo City.
Ini kasunod man sa pagpabutyag sang pumuluyo sang nasambit nga lugar batok sa nasambit nga pasilidad.
Sa interview sang Bombo Radyo kay Charlie Capiral, residente sang nasambit nga barangay, iya ginpahayag nga kontani matuman ang tanan nga mga ginpromisa sa ila, kaangay sang pag-control sang basura agud nga indi maglapta kag magbaho.
Suno kay Capiral, mas makapamaayo sa ila kon direkta nga i-process ang basura agud nga indi na magtambak.
Gin-highlight man sa aktibidad ang kinalain sang Calajunan Sanitary Landfill sa Mandurriao.
Nagalaum man ang natungdan nga makabulig sa ila ang mga benepisyo nga mahatag sang pasilidad.
Nahibaluan nga isa sa mga concern ang ginpabutyag sa forum amo ang ikaayong lawas sang mga residente ilabi na ang paguwa-sulod sang mga truck nga nagahakot sang basura.
