ILOILO CITY- Tinguhaan sang mga organizers sang community pantry sa Syudad sang Iloilo nga mapadayon ini kag makaengganyo sang mas madamo nga donors agud mahatagan sang pagkaon ang mga pigado kag ginagutom sa Iloilo City.
Sa interview sang Bombo Radyo kay Lucy Francisco sang Gabriela- Panay kag organizer sang community pantry sa Rizal, Lapaz, Iloilo City, iya ginpahayag nga masobra isa na ka semana humalin sang ginsuguran ini kag padayon sa gihapon nga nagabubo ang donasyon.
Suno kay Francisco, apisar nga kon kaisa indi man bastante ang mga donasyon, ila ginatinguhaan nga mapaigo ini agud makaambit ang tanan.
Ginpahayag naman sang natungdan nga sa pihak sang pagredtag sa ila grupo, padayon sila sa pag-organisa sang community pantry bangud madamo ang ginagutom nga mga pigado.
Nahibaluan nga isa si Francisco sa listahan sang mga gin-redtag nga aktibista nga nakaimprinta sa posters nga ginpangtakip sa palibot sang syudad.
