METRO MANILA– Nagsugod na ang implemantasyon sang community quarantine sa Metro Manila subong nga adlaw tubtob sa Abril 14, 2020.
Ini bangud sa padayun nga pagtaas sang kaso sang coronavirus disease 2019 sa pungsod kag pagpaidalom sang Pilipinas sa Code Red sub-level 2.
Gindeploy naman ang halos 2,500 nga katapo sang Armed Forces of the Philippines nga maga augment sa katapo sang Philippine National Police sa mga quarantine checkpoints.
Ginpahayag naman ni Brig. Gen Alex Luna, commander sang Joint Task Force National Capital Region, nga ang mga suldado nga makitaan sang sintomas sang coronavirus disease 2019 ang iga-pullout sa deployment lakip na ang pagpaidalom sa bug-os nga squad sa quarantine.
Dugang pa niya kun bus naman ang patigayunan sang inspeksyon, duha ka inspectors nga may dala nga thermal scanners ang magasaka sa bus agud mas mapadasig ang pagcheck sang temperatures.
Suno kay Luna,Ang mga frontliners ang magasuksok sang protective masks sa tanan nga tion kag 3 tubtob 5 ka minutos naman ang pinakamadasig nga tion agud ma clear ang isa ka bus.
Ang mga indi otorisado nga magsulod ukon magwa sa Metro Manila ang iga restrain samtang ang mga gamasakit naman ang kuhaon sang ambulansya kag dal-on sa pinakamalapit nga hospital.
Igapaathag naman sang mga personnels nga yara sa checkpoints kun nga dapat magbalik ukon indi na makapadayun sa ila pagbyahe ang mga sakay sang salakyan.
Nahibaluan nga una na ginpahayag ni Presidente Rodrigo Duterte nga ang community quarantine ang kabahin sang pagprotekta sa interes kag ikaayong lawas sang publiko.
Nahibaluan nga 111 na ang kumpirmado nga kaso sang coronavirus disease 2019 sa Pilipinas sa diin 8 diri ang nagkalamatay.
