Daw ano ka ka-handa agud pamatud-an sa imo mga boss nga perfect ang tanan nga imo ginahimo sa imo trabaho?
Didto sa probinsya sang Shandong sa East China, isa ka caretaker sang fertilizer company ang nag-inom sang tubig nga halin sa toilet bowl agud mapamatud-an sa iya mga boss nga malimpyo na ang iya nga gintinluan nga kasilyas.
Ang ginatumod nga Chinese caretaker ang may apelyido nga Luo.
Kontrobersyal ang ginhimo ni Luo kag ginapiyestahan sa subong sa social media, samtang ang iban naman nga mga netizens ang nagpakamalaot sa mga employer sang caretaker kag nagpahayag nga ginapakahuy-an nila ang ila nga trabahador.
Depensa naman sang mga employer, voluntary ang ginhimo ni Luo kag sa pagkamatuod, pila ka tuig na niya ini nga ginahimo sa ila nga kompaniya.
Pamatuod lang ini suno sa ila sang perfection ni Luo kag tuman ini ka dedikado sa iya nga trabaho.
Suno pa sa tagpamaba sang Xhongcheng Fertiliser Technology Company, confident gid si Luo sa iya pagpaninlo rason nga masarangan sini inumon ang tubig halin sa toilet bowl.
Pahayag naman ni Luo pagkatapos sang iya nga ginhimo: “I hope that all positions in the company can do their work to the extreme.”
Ginkumpirma man sang mga ka-trabaho ni Luo nga ‘very committed’ siya sa iya trabaho umpisa sang ginhire siya sang 2014 kag ginapahayag pa nga isa ka “benchmark employee” sang kompaniya.
