Nagapati ang complainant sang criminal cases batok kay Zarraga Vice Mayor Remia M. Sularan nga may mabug-at sila nga ebidensya agud nga mapasabat ang bise-alkalde sa gin-alegar nga falsification sang mga public documents agud mag-claim sang travel expenses.
Ang reklamo ang ginpasaka ni Joel A. Sularan, isa ka job hire employee sang Zarraga Municipal Hall pinaagi sa iya counsel nga si Atty. Theodore P. Banderado.
Sa interview sang Bombo Radyo kay Joel Sularan, iya ginpahayag nga confident siya sa tikang nga iya ginahimo ilabi na sa pagsumiter niya sang liquidation reports nga nagasiling nga nagtambong ang bise-alcalde sa 1st Luzon Wide Cooperative Development Officers Conference sa Venus Parkview Hotel sa Baguio City halin sang Septyembre 17-20, 2024.
Suno kay Sularan, nakabaton si Vice Mayor Remia Sularan sang P6,143.00 para sa ticket sa eroplano sang Setyembre 3 kag dugang nga P10,380.00 para sa travel expenses sang Setyembre 5.
Apang, nagapakita sa opisyal nga rekord nga si Sularan yara sa Zarraga sang Setyembre 18, 2024, sa diin nagpanguna siya sa isa ka Regular Session sang Sangguniang Bayan.
Ginpahayag man sang natungdan nga ang ebidensya nga ginpresentar sa pagsuporta sa akusasyon nagalakip sang pila ka mga key pieces sang documentation. Ini ang mga Obligation Requests para sang mga cash advance, may kaangtanan sa mga gasto sa pagbiyahe para sa conference.
Dugang pa, ang mga Liquidation Reports nga may mga ‘falsified’ nga supporting documents, pareho sang mga ticket sa eroplano, mga boarding pass, certificate of appearance, travel orders, kag mga iteneraries, ang ginsumiter.
Nahibaluan nga ang kaso ginpasaka sa idalom sang Article 217 in relation to Article 171 kag 48 sang Revised Penal Code, nga nagasakop sang malversation public funds paagi sa falsification sang mga public documents.
