Gin-athag sang Iloilo City Council nga gin-dismiss na sa lebel sang konseho ang reklamo nga gin-file batok sa punong barangay sang Buntatala, Jaro, Iloilo City nga ginapahayag nagbalabag anay sa quarantine sang isa ka nagabusong nga Covid-19 patient.
Kun balik-balikan ang isyu batok kay Punong Barangay Starlene Josenilla, ginreklamo ini sang utod sang isa ka Covid-19 patient bangud ginaalegar nga wala sini gintugtan ang nagabusong nga Covid-19 patient nga magpauli sa ila balay.
Rason naman sang punong barangay, may tatlo ka mga senior citizens nga comorbid sa balay nga iya ginapaulian kag indi pwede nga maimpon sa amo nga puluy-an bangud posible nga maglaton ang virus.
Sa interview sang Bombo Radyo kay Iloilo City Councilor Atty. Rommel Duron, chairman sang Committee on Good Government and Public Accountability sa konseho, iya ginpahayag nga may ginpatigayon na nga hearing sa duha ka partido apang ang complaint ang wala man natigayon bangud indi ini pirmado sang abogado ukon wala nanotaryohan.
Ginapahayag nga gin-file man ang kaangay nga administrative complaint sa Office of the Ombudsman kag ginahulat pa ang desisyon sini.
