Ginbasura sang Department of Justice (DOJ) ang mga reklamo nga ginpasaka ni former President Rodrigo Duterte batok kay former Interior Secretary Benhur Abalos kag iban pa nga mga opisyal nga naangot sa pag-aresto anay kay Pastor Apollo Quiboloy.
Suno sa ahensya, two counts sang malicious mischief ang ginpasaka batok kanday Abalos, Philippine National Police chief Police General Rommel Marbil, kag iban pa bangud sa pagguba sang gate sang compound sang ginserbe ang arrest warrant batok kay Quiboloy sang Agusto sang 2024.
Nagdesisyon naman ang DOJ nga wala sang nakit-an nga malisya sa amo nga akto.
Magluwas diri, gin-dismiss man ang reklamo sa violation of domicile nga gin-file man kanday Abalos, Marbil, kag iban nga mga pulis.
Santo sa alegasyon ni Duterte, ginpwersa sang mga pulis nga magsulod sa compound kag sa residential quarters nga wala sang search warrant gani nga makabig ini nga domicile right.
Apang sabat sang DOJ, wala sang ebidensya nga napresentar nga nagsulod ang pulis sa premises sang propiedad nga nagalapas sila sa layi. Ginsiling nga ang hulag sang pulis ang bangud sa ila performance of duty kag protektado sang presumption of regularity sa official functions.
Ang nag-dismiss sang complaint amo si Davao Acting City Prosecutor Angelica Laygo-Francisco.
Matandaan nga mataas ang tensyon sa tunga sang mga pulis kag Kingdom of Jesus Christ sang ginserbehan si Quiboloy sang arrest warrant.
Ang ginapangatubang sini nga kaso amo ang paglapas sa Republic Act 7610 ukon sa Special Protection of Children Against Abuse, Exploitation, and Discrimination Act; kag ang non-bailable qualified human trafficking charge.
