ILOILO CITY–Ginlunsyar na ang Communication Plan “Clean Rider” sang Police Regional Office (PRO) 6.
Ang launching activity sang “Clean Rider” ang ginpatigayon sa isa ka mall sa Brgy. Ungka, Pavia, Iloilo sa diin madamu na ang nakakuha sang Clean Rider sticker.
Sa interview sang Bombo Radyo kay Police Superintendent Joem Malong, taghambal sang PRO6, tinutuyo sang paglunsyar sang ComPlan Clean Rider amo nga madali nga mahibalu-an kun si sin-o ang tag-iya sang motorsiklo ilabi na kun may yara sang krimen.
Bag-o hatagan sang sticker, kinahanglan nga may yara sang Official Receipt and Certificate of Registration, Valid IDs kag driver’s license.
Ang Clean Rider sticker ang ginatapik sa una nga bahin sang motorsiklo agud madali nga makita.
Mangin centralized man ang data management system rason nga mas mahapos na nga makilala ang tag-iya sang motorsiklo.
Kadungan sini, gin-athag ni Malong nga indi sa gihapon makaluwas sa pag-usisa ang mga tag-iya sang motorsiklo nga may yara na sang stickers.
Wala sang dapat nga kahangaw-an ang mga driver bangud nga wala sang bayad ang pagkuha sang sticker nga available sa pinakamalapit nga police station.
Wala naman sang may gintalana nga deadline sa pagkuha sang clean rider sticker suno kay Malong.