Dugangan pa ang mga compliance officers sa syudad sang Iloilo nga amo ang magatutok sa pagpatuman sang mga health protocols sa mga pampubliko nga salakyan.
Ini ang kasunod sang naobserbahan sang otoridad nga nagamat-mato pahalog sa pagsulundan ang iban nga mga drivers kag operators.
May mga nakit-an nga nagapasakay sang mga pasahero nga masobra sa 50% seating capacity, may mga barriers nga wala naislan, kag madamo pa sang iban nga bayolasyon nga nagapataas sang risgo nga malapas ang physical distancing.
Sa interview sang Bombo Radyo kay Jeck Conlu, pinuno sang Public Safety and Transportation Management Office kag nagaserbe man bilang spokesperson sang COVID-19 team sang Iloilo City Government, iya ginpahayag nga magadeploy sila sang mga personnel sa mga terminal sang van, jeep, kag bus agud mamonitor ang nagagwa-sulod nga mga salakyan sa syudad sang Iloilo.
Kun may makit-an nga paglapas sa pagsulundan, maga-isyu sang ticket ang compliance officers ukon ang sin-o man nga deputized personnel.
Sa masunod nga semana, natalana man nga ipatawag ang mga asosasyon ukon kooperatiba sang Public Utility Jeepneys agud nga ma-check man ang ila nga pagdisiplina sa ila nga mga drivers.
Sa subong, nagapabilin sa 50% ang passenger load sa mga salakyan samtang wala pa sang mandu nga napapanaug ang national government.
