ILOILO CITY – Bukas si anay Senate President Aquilino “Nene” Pimentel Jr. kung Constituent Assembly (Con-Ass) ang gamiton sa pag-amyenda sa Konstitusyon.
Sa exclusive interview sang Bombo Radyo Iloilo, ginpahaya ni Pimentel nga kun igaduso gid ni Presidente Rodrigo Duterte ang Con-Ass, iya ini batunon apang ginpanindugan nga mas maayo gihapon ang Constitutional Convention (Con-Con) para sa Charter change.
Apang gin-athag sang ginakabig amay sang Local Government Code nga kun Con-Ass, dapat magpatigayon sang public hearings ang Kongreso.
Dal-on dapat sa mga malayo nga lugar ang diskusyon angot sa pagbag-o sang Konstitusyon padulong sa federal form of government ilabi na sa rehiyon sang Mindanao.
Suno kay Pimentel, ang hearings sang Kongreso sa Charter change kaangay sang natabo kahapon sa Senate Committee on Constitutional Amendment kun sa diin isa siya sa mga resource person, ang panugod pa lang.
Dapat nga maityindihan suno kay Pimentel sang tagsa ka Pinoy ang importansiya kag mangin epekto sang pagbag-o sa Konstitusyon.