Gintawag ni Iloilo City Lone District Representative Julienne “Jamjam” Baronda nga isa ka ‘political plan’ lamang ang ginpasaka nga kaso ni former Iloilo City Councilor Plaridel Nava.
Ini kasunod sang pagpasaka ni Nava sang kaso may kaangtanan sa ginapahayag ‘unexplained wealth’ ni Baronda.
Sa interview sang Bombo Radyo kay Rep. Baronda, iya ginpahayag nga hayag kag bukas sa publiko ang iya nangin pangabuhi.
Suno kay Baronda, simple lamang siya nga nagpangabuhi sugod sang nagsulod siya sa pulitika sang tion sang siya ang isa pa Sangguniang Kabataan (SK).
Ginpaanggid man sini ang kaso nga ginpasaka ni Nava sa kaso nga ginpasaka man sa iya amay nga Councilor Nick Baronda.
Para sa mamalidha, mabasura man ini sa gihapon sang Office of the Ombudsman.
Ginlaragway man ni Baronda nga halin sang-una, ang tanan nga kaso nga ginapasaka batok sa ila pamilya ang lunsay pagpangguba lamang.
Nagpanindugan man ini nga wala siya nakulbaan bangud indi man sila kawatan.
Gin-athag man ni Baronda nga ang mga laragway nga ginpakigbahin ni Nava sa publiko nga ginapahayag sini nga ‘unexplained wealth’ ang lunsay ginhuram lamang niya.
Suno kay Baronda, ka damo sang mga may luyag nga magpahulam sa iya ilabi na nga indi lamang ila barangay ang iya igarepresentar sa tion sang State of the Nation Address (SONA) sang president.
Para sa natungdan, kinahanglan lang nga dapat preparado ang representative sang syudad sa dako nga kahiwatan rason man nga dapat presentable sa publiko.
