Outgoing Iloilo 4th district Congressman Ferjenel Biron
Indi mabaton ni Iloilo 4th district Congressman Ferjenel Biron ang iya kapaslawan sa gubernatorial elections sa probinsya sang Iloilo.
Nahibaluan nga makaduha ka beses na nga nalutos si Biron sa pagpadalagan sini sa pagka gobernador.
Una nga nalutos si Biron sang nagpadalagan ini sa gubernatorial elections sang tuig 2013 sa diin nakasumpong sini si outgoing Iloilo Gov. Arthur Defensor Sr. kag liwat naman ini nga napierde sang tinalikdan nga May 13, 2019 midterm elections sa diin nakasumpong sini ang anak sang gobernador nga si Iloilo 3rd District Congressman kag subong governor elect Arthur ‘Toto’ Defensor Jr.
Ang kapaslawan ni Biron sa piniliay ang rason sa pagpasaka sini sang election protest batok kay Defensor Jr. sa Election Contest and Adjudication Department sang Commission on Elections (Comelec).
Sa exclusive interview sang Bombo Radyo Iloilo kay Cong. Biron, iya ginpahayag nga luyag niya pabuksan ang tanan nga mga balota kag magpatigayon sang manual recount sa bilog nga probinsya.
Iya ginapanidugan nga may natabo nga anomaliya sa natabo nga canvassing sang boto.
Suno kay Biron, may mga botante nga makapamat-ud nga siya ang ginboto sa balota apang sa paggwa sang resibo sa Vote Counting Machine, si Defensor na ang nakabutang.
Ginpahayag man ni Biron nga may yara sang kapin 100 mil ka boto sa probinsya sang Iloilo ang wala maisip kag katingalahan kun diin ini nagkadto.
Gindugang man niya mabudlay man i-reconcile ang resulta sang election sa resulta sang survey sa Random Access Consultants Inc. (RACI) sa diin consistent ini nga nagapangibabaw sa survey.
Samtang, sa interview sang Bombo Radyo, ginkadlawan lang ni Defensor ang nangin tikang sang iya nalutos nga kasumpong.
Suno kay Defensor, kaangay nga wala sang merito ang mga grounds ni Biron sa pag-file sang election protest.
Sa subong suno kay Defensor, wala pa niya nabaton ang kopya sang nasambit nga petisyon.
