Ginakabig ni Iloilo 3rd District Representative Lorenz Defensor nga dako nga dungog nga malakip sa 11 sa mga prosecutors sa impeachment trial batok kay Vice President Sara Duterte.
Sa interview sang Bombo Radyo kay Rep. Defensor, iya ginpahayag nga nalipay ini nga ginsaligan siya sang liderato sang kamara agud mangin isa sa mga prosecutors.
Suno sa kongresista, isa man ini ka dako nga pagpanghangkat bangud nga dako ini nga responsibilidad nga mapakita ang mga ebidensya agud kumbinsihon ang Senado nga may bastante nga grounds agud i-impeach ang bise presidente.
Pahayag niya, may nabatyagan man siya nga pressure apang kabahin ini sang iya nga constitutional duties gani ginbaton niya ang amo nga katungdanan.
Matandaan nga nakatipon sang suporta sang supermajority ang kamara matapos nga 215 ka mga mamalidha ang nagpirma pabor sa pag-impeach kay Duterte.
Ini ang masobra sa required nga 1/3 vote halin sa mga member sang House of Representatives.
Matapos nga gin-endorso sa Senado ang impeachment complaint, ginatugyan na sang kamara sa upper chamber sang kongreso ang masunod nga tikang sa pag-convene bilang Impeachment Court.
Nahibaluan nga ang impeachment ang kasunod sang tatlo ka complaints nga gin-file batok kay Duterte bangud sa ginaalegar nga misuse of confidential funds, graft and corruption, kag betrayal of public trust— nga lunsay grounds for impeachment sa idalom sang 1987 Constitution.
Dugang ni Defensor, ini nga ikaapat nga impeachment complaint sang kamara ang may yara lang sang pito ka Articles of Impeachment apang tuman ka klaro diri ang mga nahimo ni Duterte nga paglapas sa layi particular na ang pagpahog niya nga patyon ang president nga makabig nga high crime.
