Nagbuya sang mga tinaga si Iloilo First District Rep. Dr. Janette Garin agud kontrahon ang una nga mga pahayag ni incumbent first district Board Member Renee ‘Coy’ Valencia, isa sa mga magapadalagan sa pagka-alkalde sa banwa sang Tigbauan.
Si Valencia kag si Dr. Garin ang pareho nga yara sa idalom sang National Unity Party (NUP), apang sa 2022 elections, lain nga kandidato ang suportahan sang kongresista sa Tigbauan: gina-endorso sini si former Tigbauan Vice Mayor Dr. Roel ‘Biboy’ Jarina sang Lakas-CMD Party.Gintawag ni Garin nga misleading ang mga statement ni Valencia.
Suno kay Garin, indi matuod nga “indi na sila updanay” sang nagligad nga 2019 elections. Pareho sila suno sa iya nga si anay 4th District Rep. Dr. Ferjenel Biron ang gin-suportahan sa governatorial race apang, “nakita sang mag-asawa nga Valencia nga sa surveys, leading si Governor Defensor. Amo man ang balik-balik nila ka istorya sa amon nga kun sin-o ang manugdaog sa surveys, sila ang imawan ta,” suno kay Garin.
Magluwas diri, ginpahayag man ni Garin nga kuntani “indi lang pag-gamiton sa pamulitika” ang pagtaliwan ni the late Guimbal Mayor Oscar ‘Oca’ Garin. Una nga ginpahayag ni Valencia nga suod sila kay Oca Garin. Apang suno sa kongresista, sang buhi pa ang Garin patriarch, “nagalikaw ini sa discussions kananda (mag-asawa nga Valencia) bangud pirme may intriga against sa sitting officers.”
Wala man ginpalampas ni Garin ang pahayag ni Valencia nga ginpatawag sang una ang iya bana nga si Dennis Valencia agud tanyagan nga mangin mayor nga “wala sang kontra kag wala sang gasto.” Indi ini matuod suno kay Garin bangud “it is the other way around: ang mga Valencia ang gusto-gusto gid nga mag-istorya.”
Ginpaathag ni Garin nga kay Jarina ang ila nga suporta bangud si Jarina amo ang luyag sang 70% sang populasyon sang Tigbauan. Maathag man suno kay Garin nga makit-an ini sa eleksyon bangud sa tanan nga incumbent councilors nga maga-pa-eleher liwat sa 2022, isa lang gid ang nag-upod kay Valencia. Ang nabilin ang magaupod kay Jarina. ##
