ILOILO CITY — Ginatugyan nagid lamang ni Congressman Arcadio H. Gorriceta ang pagpamat-ud sa Local Government Unit (LGU) sang Leon angot sa ginpatigayon nga nude photoshoot sa ginakabig nga “Baguio of Iloilo” ang Bucari sa Leon, Iloilo.
Suno kay Cong. Gorriceta, naintindihan sini kung ngaa nagainit ang ulo ni Mayor Rolito Cajilig sa mga nagpatigayon sang nude photo shoot sa lugar ilabi pa nga ginadevelop ini sa karon kag ginaplanuhan sang alkalde nga himu-an sang Stations of the Cross.
Nagalaum ang mamalidha nga may maayo nga madangtan ang pag-istoryahanay nanday Mayor Cajilig kag ang grupo sang mga nagpatigayon sang photo shoot.
Sa iya nga bahin, maluyag man kuntani ini nga makig-istorya apang magabalik na ini sa Lunes sa kongreso.
Ginalauman dugang sang mamalidha nga indi na masulit pa ang kaangay nga insidente nga sa paghambal pa gani ni Mayor Rolito Cajilig sa iya, sahi sang pagpangbaboy sa tourist Destination.