Nagapati si Iloilo City Lone District Representative Julienne “Jam-Jam” Baronda nga maalam sa gihapon ang mga Barangay Officials kag Sangguniang Kabataan (SK) sa pagpili sa ila luyag nga mga lideres sa 2025 midterm elections.
Sa interview sang Bombo Radyo kay Congresswoman Baronda, iya ginpahayag nga apisar nga may mga limitasyon sa pagpakita sang suporta ang mga opisyal sang gobyerno, nakahibalo siya nga ang tagipusuon nila ang maga-boto sang insakto.
Gin-athag man sini nga wala siya sang ano man nga plano nga magpamahog sa mga opisyal nga wala nagasuporta sa ila nga linyada.
Una na nga ginaduso sang mamalidha nga nagakadapat nga untaton na ang mga madamo nga parking fees sa syudad nga isa man sa mga pagsulundan sang Iloilo City Government.
Ginpunto man ni Baronda ang mga utang sang syudad nga para sa iya, tuman ka dako para sa mga proyekto kaangay sang rehabilitation sang mga merkado.
Suno kay Baronda, dapat nga tapuson na man ang city hospital bangud madugay na nga wala ini matapos apisar sang pagbayad sang tax sang mga pumuluyo.
Lakip man sa gintumod sini ang Housing Project sang syudad nga dapat mas masarangan nga mabaydan sang mga Ilonggo ang bulanan sini nga presyo.
