𝗜𝗟𝗢𝗜𝗟𝗢 𝗖𝗜𝗧𝗬 — Nagsabat si Iloilo City Lone District Representative Julienne “Jam-jam” Baronda kaangot sa pagbasol sa Department of Public Works and Highways (DPWH) kaangot sa pagpauntat sang proyekto nga sea wall sa Brgy. Rizal Pala-Pala 1, 2, kag Tanza Bonifacio, Iloilo City.
Ini kasunod man sang pagdagdag ni Iloilo City Mayor Jerry Treñas sang cease and desist order agud pauntaton ang pagpatukod sang proyekto bangud sa kakulangan sang requirements.
Sa interview sang Bombo Radyo kay Baronda, iya ginpahayag nga indi dapat pagbasulon ang kun sin-o ang nagpondo sa amo nga proyekto kag dapat lantawon man ang bahin sang kontraktor kun sila ang may kakulangan.
Suno kay Baronda, dako ang iya nga pagsalig sa Department of Public Works and Highways bangud isa ang ahensya sa nagbulig agud nga mapondohan ang proyekto nga ginplano sang 2021- 2022.
Ginpahayag man sini nga personal siya nga nagpadulong sa opisina sang DPWH kag Office of the President agud nga mapondohan ang proyekto, rason nga nahatagan ini sang P400 million nga budget.
Gin-athag man sini nga ang mga residente ang makapulos sa amo nga proyekto kag indi ang mga lederes.
Ginpahayag man sang mamalidha nga ginpatukod niya ang proyekto agud nga maprotektahan ang mga residente batok sa balo kag high tide bangud masami nga ginabaha ang lugar.
Para sa natungdan, wala sang problema kun mangin palaagyan man ang sea wall agud makahatag sang access road sa naaminhan kag nabagatnan nga bahin sa Iloilo City agud nga mabuhinan man ang traffic congestion.
Dugang pa ni Baronda nga wala na siya sang mahimo kun padayon nga balabagan ang proyekto,sa diin, nagpabilin na lang ini sang mga tinaga nga “Habang may buhay, may pag-asa”.
Nag-apelar man ini sa mga pumuluyo nga magbuligay agud nga matukod ang mga proyekto kag matigayon nga matapos sang mas temprano.
