𝗜𝗟𝗢𝗜𝗟𝗢 𝗖𝗜𝗧𝗬 — Ginatigayon ni Iloilo City Lone District Representative Jam-jam Baronda nga mahatagan sang shelter assistance ang mga naapektohan sang sunog sa Brgy. Airport, Mandurriao, Brgy. Tanza Bonifacio kag Brgy. Rizal Estanzuela, Iloilo City Proper.
Sa interview sang Bombo Radyo kay Baronda, iya ginpahayag nga luwas sa cash assistance, hatagan sang shelter assistance ang mga nasunogan paagi sa bulig sang Department of Human Settlements and Urban Development.
Suno kay Baronda, personal siya nga nagpadulong sa nasambit talatapan agud nga mahatagan sang igtalupangod ang tuyo sini nga tikang.
Nagpagkig-angot man ang mamalidha sa Iloilo City Local Housing Office agud nga maghatag sang lista sang posible nga makabaton sang amo nga bulig.
Ginpahayag man sini nga may yara sang P200 million nga pondo nga gin-alokar ang house of congress sa Department of Human Settlements and Urban Development, sa diin, isa ang Iloilo sa una nga makabenepisyo sini.
Matandaan nga nakapangayo naman si Baronda sang ayuda kay House Speaker Ferdinand Martin Romualdez sa diin P10,000 ang ginhatag sa mga totally burned kag P5,000 naman sa partially burned sa Brgy. Tanza Bonifacio kag Brgy. Rizal Estanzuela, Iloilo City Proper.
