“Indi kita mamasol kung indi ka certain.” Liwat nga nagpanindugan si Lone District Representative Julienne “Jam Jam” Baronda sa isyu nga ginapangatubang sang proyekto sang DPWH, kasunod sang mga reklamo halin sa pila ka barangay officials sa Jaro, lakip na si Kapitan Mary Jane Jecara sang Brgy. Tagbak.
Suno sa iya, ang lugar flood-prone na bisan sang una pa, pero karon ginatudlo ang proyekto nga rason sang pagbaha.
Para kay Baronda, kun may problema, kinahanglan sang solusyon — indi dapat mamasul dayon, labi na kun wala sang kasiguruhan.
Ginklaro niya nga ang proyekto sang revetment wall/ bike lane may tinutuyo nga makabulig sa epekto sang climate change kag indi lang para sa pasilidad sang bikers.
Ang revetment wall, suno sa iya, gintukod agud protektahan batuk sa soil erosion.
Ginkwestyon man ni Baronda ang pahayag nga gintampukan ang creek para lang himuon nga bike lane kag ginpahanumdom niya nga mismo ang mga residente sang una ang nagapanawagan nga pahimuan sang bike lane sa lugar.
Ginbuyagyag man niya nga may drone footage halin sa DPWH nga nagpapakita nga may husto pa nga flow sang tubig sa area.
Dugang pa niya nga ang problema amo ang basura sa ‘vegetation’ nga nagtubo sa creek, nga posible nga nagaka-contribute sa pagbaha — ini, suno sa iya, dapat buligan sang tanan nga barangay officials.
Ginpaathag man ni Baronda nga indi pwede nga litrato lang ang basehan kag dayon ibasol ang proyekto. Dapat, kun may nakita nga problema, i-report dayon sa DPWH antes pa man magsobra ang epekto.
Ginpasalig man niya nga may kumpiyansa siya sa expertise sang mga engineers sang DPWH Regional Office kag sang Iloilo City Engineering Office. Wala siya naga-question sa kapasidad sang mga Ilonggo engineers.
Ginpahanumdom ni Baronda ang tanan nga lideres: antes magpagwa sang pahayag, siguruhon ang kamatuoran — kay sa ulihi, ang mga lider responsable sa katawhan.
