ILOILO – Ginkumpirma ni Iloilo 1st District Congresswoman Janette Garin nga siya ang nag-nominate kay Manila 6th District Rep. Bienvenido Abante Jr. sa pagka House Speaker sang Kamara.
Sa interview sang Bombo Radyo kay Cong. Garin, iya ginpahayag nga ginakasubo niya ang pagbinotohay bangud nakakuha lamang si Abante sang 28 ka mga boto batuk kay Taguig Rep. Alan Peter Cayetano nga may 266.
Suno kay Garin, ginsuportahan niya si Abante apisar nga myembro ini sang National Unity Party samtang myembro naman ang mamalidha sang Nationalista Party kaangay ni Cayetano.
Ini man bangud nga nadesisyonan ni Garin nga mag-upod sa minorya agud nga mas maka-contribute pa siya diri ilabi na nga mas nagahatag sang constructive criticism ang mga myembro sang minority kag naga-usisa sang maayo sa layi.
Isa man sa iya rason amo nga una ginapamatian ang minority antes makahambal ang mga myembro sang majority sa Kamara.
Nahibaluan nga ginkilala na si Abante bilang House minority leader.
