Nagapati si Iloilo 1st District Representative Janette Garin nga makaistoryahanay si Iloilo 5th District Representative Raul “Boboy” Tupas kag Iloilo 4th District Representative Ferjenel Biron.
Ini kasunod man sa pahayag ni Tupas nga wala ini ginpahibalo ukon ginhatagan sang pormal nga komunikasyon matapos nga may ginpili na si Iloilo Governor Arthur Defensor, Jr. sang iya tandem.
Sa interview sang Bombo Radyo kay Congresswoman Garin, iya ginpahayag nga nagkulang lang sang komunikasyon ang duha ka kampo.
Suno kay Garin, nagapati siya nga may panahon pa agud nga istoryahan ang bahin sang pagpapili ni Congressman Boboy Tupas ilabi na sa pagkonsulta sa tagsa nila ka partido.
Gin-athag man sang natungdan nga bukas ang duha ka mga mamalidha agud nga makigsapol sa amo nga sirkumstansya.
Nahibaluan nga apisar sang pagpakita sang interes ni Tupas nga magpapili bilang vice governor, ginduso sa gihapon ni Biron si Anilao Mayor Lee Ann Debuque nga mangin bise-gobernador ni Defensor para sa 2025 midterm elections
Ginpaguwa ni Garin ang ini nga pahayag kasunod sang iya pag-file sang certificate of candidacy (COC) bilang kongresista.
Kaupod man sini amo sanday Board Member Jo-Ann Germinanda kag Rica Jane Garin nga mapadalagan bilang board member sang premier distrito.
