Gin-athag ni Iloilo 1st District Representative Janette Garin nga isa lamang ka pinamilya nga inaway ang natabo nga pagbinaisay sa tunga nanday San Joaquin, Iloilo Mayor Ninfa Garin kag Vice Mayor Marvigrace “Taba” Getuya.
Sa interview sang Bombo Radyo kay Cong. Garin, iya ginpahayag nga sang-una nga ayohay pa si Mayor Ninfa Garin kag si Vice Mayor Taba Getuya, masami nga ginaupod sini kon sa diin makadto.
Suno kay Garin, anay na nga ginakabig ni Ninfa Garin nga anak si Taba Getuya tubtob man nga ginbuligan sini agud nga mangin bise-alkalde sa nasambit nga banwa.
Gin-athag man sini nga may mga diskusyon sa ila duha nga nagresulta man sa indi pag-intindihanay.
Gin-ako man sang natungdan nga ang isa ka mayor nga ginhalinan sang ila paglainay sang buot, amo ang agaway sang San Joaquin Mother and Child Hospital.
